化學防曬同物理防曬嘅是是非非，經常被護膚行業拎嚟比較。

化學防曬同物理防曬最大不同係在於—如何阻擋紫外線。
物理防曬，like a shield：於皮膚表面並充當屏障，將原本照射係皮膚上嘅紫外線，再折射出去，阻隔紫外線傷害皮膚。
化學防曬，like a sponge：滲入皮膚，好似海綿咁吸收照射係皮膚上嘅紫外線能量，防止紫外線進一步進入皮膚底層造成傷害。

有人會狂踩化學防曬毒害人體健康，高舉物理防曬安全有效。我哋今次中立啲去睇，嘗試持平地去睇下整件事，為自己嘅皮膚作出最穩陣最負責任嘅選擇。

有研究所話化學防曬會被身體吸收，繼而誘發致癌風險及干擾荷爾蒙分泌。坦白講，化學防曬對皮膚及人體潛在嘅危害，到依家都係未有定論。所以公平啲講，如果對人體真係好大危害，FDA、歐盟呢啲權威機構應該一早就ban 咗。

2021年9月FDA 公佈咗關於防曬嘅Deemed Final Order，一共有16款活性成份可接受用作防曬劑*，
入面就只有Titanium dioxide 二氧化鈦, Zinc oxide 氧化鋅呢兩種活性成份係物理防曬。

緊隨其後補充：「儘管防曬產品的保護作用發生在皮膚表面，但有證據表明，有一些防曬活性成份可以通過皮膚吸收並進入體內。這使進一步的研究變得非常重要，以證實當按照指示使用活性防曬成份的防曬產品時，是否以及在何種程度上，可能會導致意外的、慢性的、系統性的風險。」

而Deemed Final Order 其實可以話只係一個暫時性或過渡性嘅指標，因為FDA 係Deemed Final Order 後面仲有Proposed Order（未正式生效的）。Proposed Order 列出咗對Deemed Final Order 嘅提議修訂，所以Proposed Order 係反映咗FDA 未來對防曬產品嘅要求。

Proposed Order 同Deemed Final Order 最大嘅分別，
係對16款可接受活性防曬成份分為
(1) GRASE* = ✅整體上被認為安全及有效
(2) not GRASE = ❎不是整體上被認為安全及有效
 (“generally recognized as safe and effective”)
被列為整體上被認為安全及有效嘅成份只有 Zinc oxide 氧化鋅同Titanium dioxide 二氧化鈦！

另外14款化學防曬則因為
有證據表明有安全問題或缺乏支持其安全性嘅數據，
因此全部都會被列為不是整體上被認為安全及有效。
呢個表就清楚列明FDA 嘅分類：

不過FDA 都有帶頭盔，話咁又唔代表佢哋只係支持大家使用Titanium dioxide 及Zinc oxide 呢兩個成份。

只係佢哋將來需要更多數據去證明not GRASE 嘅防曬成份係安全並有效，先可以進一步改變佢哋嘅condition。

如果你健健康康，什麼經期紊亂，M前狂爆瘡／爆大瘡，全部唔關你事，咁你梗係有勇氣，亦有「資本」去用呢啲「未確定但可能潛在風險」嘅防曬成份。但假若你有以上問題，又睇緊中醫／食supplement 調理緊，可能你就唔想拎自己嘅身體嚟搏啦！
眼前有一個100% safe 嘅選擇，又點解要揀一個尚未證實具百分百安全性嘅次選呢?
或者你本身已經因為內分泌問題而引起無限loop 嘅暗瘡同敏感，知道咗以上資訊後，我相信你會將因為吸收到化學防曬而干擾荷爾蒙嘅可能性減至零！

講多少少資訊，2018年5月夏威夷州議會通過禁止銷售含有oxybenzone 二苯甲酮及octinoxate 甲氧基肉桂酸辛酯嘅防曬用品，並於2021年1月1日正式生效。原因係要保護海洋美麗珍貴嘅珊瑚礁。如果大家係熱愛海洋，熱愛環境保育嘅一分子，最好都唔好用含有呢兩個化學成份嘅防曬啦！

小總結：
喺化學防曬同物理防曬面前，大家要認清佢哋都係為咗對抗邪惡嘅紫外線☀️。紫外線先係我哋嘅最大敵人，可以輕易滲透皮膚深層，破壞皮膚，導致皮膚老化鬆弛，最嚴重甚至可引致皮膚癌。所以記得一年四季，晴天陰天雨天，都要搽防曬；避免上午10點至下午3點之間曝露係陽光下；需要時最好擔遮⛱️、戴帽、戴太陽眼鏡，同著淺色長袖衫呀。

資訊性嘅嘢講到呢度先，下篇就同大家介紹Tag Concept 上架中嘅物理防曬～
From: 丁丁

*Deemed Final Order 中16款活性成分可接受用作防曬劑＊(acceptable active ingredients in products that are labeled as sunscreen)為：Aminobenzoic acid, Avobenzone, Cinoxate, Dioxybenzone, Homosalate, Meradimate, Octocrylene, Octinoxate, Octisalate, Oxybenzone, Padimate O, Ensulizole, Sulisobenzone, Titanium dioxide, Trolamine salicylate, Zinc oxide